Shtëpia e Bardhë ka dalë me një deklaratë zyrtare lidhur me bisedën telefonike të zhvilluar mes presidentit të SHBA-ve, Joe Biden dhe kryeministrit izraelit, Benjamin Netanyahu lidhur me konfliktin në Rripin e Gazës.
Sipas Shtëpisë së Bardhë, Biden e bëri të qartë nevojën që Izraeli të zbatonte hapa konkrete për trajtimin e dëmeve të shkaktuara ndaj civilëve dhe sigurisë së punonjësve humanitarë, 7 prej të cilëve u vranë nga një bombardim izraelit.
Ai gjithashtu i tha kryeministrit izraelit se mbështetja e SHBA për konfliktin e Izraelit në Gaza varej nga kjo. Gjatë bisedës telefonike që zgjati rreth 30 minuta, Biden e cilësoi situatën humanitare në Gaza si “të papranueshme”.
Presidenti theksoi gjithashtu se një armëpushim i menjëhershëm ishte thelbësor për të stabilizuar dhe përmirësuar situatën humanitare dhe për të mbrojtur civilët e pafajshëm.
Për mbrojtjen e personelit humanitar, pas vdekjes së shtatë punonjësve të ndihmës në një sulm ajror izraelit në Gaza, në deklaratën e Shtëpisë së Bardhë thuhet:
“Presidenti Biden theksoi se sulmet ndaj punonjësve humanitar dhe situata e përgjithshme humanitare janë të papranueshme. Ai e bëri të qartë nevojën që Izraeli të shpallë dhe zbatojë një sërë hapash specifikë, konkretë dhe të matshëm për të trajtuar dëmtimet civile, vuajtjet humanitare dhe sigurinë e punonjësve të ndihmës. Ai e bëri të qartë se politika e SHBA-së në lidhje me Gazën do të përcaktohet nga vlerësimi ynë i veprimit të menjëhershëm të Izraelit ndaj këtyre hapave”.
