Kovaçevski tha sot se në Strumiçko nuk do të ketë miniera. Në seancën e ardhshme të qeverisë, Ministria e Ekonomisë do të prezantojë sërish të gjithë dokumentacionin për çështjen, pasi dje u bë e ditur se Bekteshi mashtroi ministrat duke u thënë se Gjykata Administrative ka marrë vendim për shkrirjen e koncesioneve.“Në seancën e ardhshme të Qeverisë, Ministria e Ekonomisë me të gjitha dokumentet e vitit 2012 do t’i informojë të gjithë ministrat për procedurën e mëtutjeshme. Megjithatë, qëndrimi i LSDM-së është i qartë se nuk mund të ketë minierë nëse nuk e dëshirojnë qytetarët e rajonit. Kjo Qeveri vepron vetëm në interes të qytetarëve, për t’i mbrojtur nga dëmet e mundshme të mëdha”, tha Kovaçevski, duke iu përgjigjur pyetjes së gazetarit për promovimin e sistemit të përbashkët elektronik për mbledhjen e tarifave me Serbinë.
Fajtor për situatën, sipas Kovaçevskit, është VMRO-DPMNE sepse në vitin 2016 i dhanë koncesionet investitorit të huaj për hapjen e tyre. Ai tha se lideri i VMRO-DPMNE-së Hristijan Mickoski nuk ka të drejtë të flasë për minierat kur ishte partia e tij ajo që i dha koncesionet, por atëherë askush nuk u lejua të flasë e të shkruajë për këtë, e as të organizojë protesta.
