Gjatë një sulmi të djeshëm ndaj gazetarëve në Leposaviq ku mbetën të lënduar disa prej tyre, në disa pamje që u publikuan në rrjet u pa mos-ofrimi i sigurisë ndaj këtyre gazetarëve nga KFOR-i.
Ky mos-reagim i tyre për t’u ofruar ndihmën e nevojshme gazetarëve u kritikua mjaft shumë në vend, ku edhe Asociacioni i Gazetarëve të Kosovës (AGK) ka kërkuar nga KFOR-i që të mos i pengojë gazetarët, meqë atyre s’po u ofron siguri.
Sot, kur kanë kaluar pothuajse 24 orë nga ky sulm, KFOR-i ka dalë me një komunikatë, i cili ka dënuar sulmet mbi gazetarët e kameramanët në veri të Kosovës, teksa i bëri thirrje të gjitha palëve që të përmbahen.
“Ne u bëjmë thirrje të gjitha palëve që të përmbahen nga dhuna ose veprimet e mëtejshme që mund të çojnë në përshkallëzim të mëtejshëm dhe të sigurojnë që mediat të mund të kryejnë punën e tyre themelore në mënyrë të sigurt”.
“Liria e shtypit dhe liria e shprehjes janë vlera themelore të cilat duhet të respektohen nga të gjithë. Ne u bëjmë thirrje të gjitha palëve që të përmbahen nga dhuna ose veprimet e mëtejshme që mund të çojnë në përshkallëzim të mëtejshëm dhe të sigurojnë që mediat të mund të kryejnë punën e tyre themelore në mënyrë të sigurt”, thuhet në komunikatë.
KFOR-i gjithashtu në këtë komunikatë ka përsëritur deklaratën e tyre se është “reaguesi i tretë, e Policia e Kosovës përgjegjëse për sigurimin e sundimit të ligjit në mbarë Kosovën”.
Misioni ka bërë të ditur tutje se komandanti i KFOR-it është në kontakt të rregullt me të gjithë homologët e tij kryesorë, përfshirë përfaqësuesit e institucioneve dhe organizatave të sigurisë në Kosovë, si dhe me përfaqësues të Forcave të Armatosura të Serbisë, Misionit të BE-së për Sundimin e Ligjit (EULEX), OSBE-së dhe komunitetit diplomatik.
