Për shkak të gjendjes së keqe të buxhetit dhe fondeve të pasigurta për projekte dhe detyrime në arsim, mësuesit nuk do të kenë rritje pagash prej 12 për qind në shtator, siç kërkon sindikata, por do të ketë rritje në muajin mars.
“Unë po luftoj dhe do të luftoj në mënyrë të ashpër për mësuesit dhe do të vazhdoj dhe do të insistoj që të realizohet ajo që u kemi premtuar. I kemi premtuar në vitin e parë – për këtë Qeveri viti i parë është nga qershori deri në qershorin e ardhshëm. Në vitin e parë ata sigurisht që do të marrin një rritje. Në muajin mars do të kenë rritje rrogash, aq sa i lejon Buxheti. Gjatë vitit, nëse ka mundësi, edhe një rritje, që të jenë të kënaqur dhe të motivuar”, deklaroi sot ministrja e Arsimit dhe Shkencës Vesna Janevska.
Duke iu përgjigjur pyetjeve të gazetarëve pas vizitës në komunën e Aerodromit, Janevska theksoi se si mësimdhënëse i di saktësisht “problemet dhe sfidat dhe me çfarë peshe dhe presionesh përballen mësimdhënësit”, por ajo beson se ata do të kenë mirëkuptim për mundësitë reale.
“Po të kisha mundësi, nesër do t’ua rritja rrogën, jo për 12 për qind që kërkon sindikata. Preferohet 30, 40, 50 për qind. Dhe nuk ka dyshim që duhet të kenë paga më të larta, po them vetëm mundësitë reale, po them atë që kemi trashëguar nga qeveria e kaluar. Nëse ai ministër apo ndonjë ministër tjetër do ta kishte planifikuar saktë buxhetin, ne mund të mos kishim problem. Po përballemi me fondeve të mëdha për tekste, fonde të mëdha për standardet e nxënësve që nuk janë paguar, fonde të mëdha për standardet e studentëve që nuk janë paguar, probleme me transportin. E shihni që po rinovohen klasat, po rinovohen ambientet sanitare. Kjo është gjithçka që është e nevojshme. Jo se pagat e mësimdhënësve nuk janë të nevojshme, ato janë gjithashtu të rëndësishme, por jam e bindur se do të kenë mirëkuptim”, tha Janevska.
