Me vëmendje po i përcjell diskutimet publike lidhur me rastin në të cilin është përfshirë gazetarja znj. Liridona Vejseli.
Në këtë kontekst, është e rëndësishme të theksohet se liria e medias dhe e drejta për informim janë vlera themelore të një shoqërie demokratike dhe duhen mbrojtur në çdo rrethanë, gjithmonë në përputhje me ligjin dhe standardet profesionale.
Pa paragjykuar asnjë proces gjyqësor dhe pa hyrë në përmbajtjen e asnjë dokumenti konkret, konsideroj se është e domosdoshme që çdo trajtim ndaj gazetarëve të bëhet me maturi, proporcionalitet dhe respekt për rolin e tyre në shoqëri.
Media e lirë dhe e përgjegjshme është në interes të qytetarëve dhe të institucioneve njëkohësisht, sepse vetëm përmes transparencës dhe dialogut ndërtohet besimi në demokraci.
