Ish-shefi i kabinetit të presidentit Donald Trump në Shtëpinë e Bardhë ka shprehur shqetësime për sigurinë lidhur me shtizat e reja të flamurit që po vendosen në ambientet e jashtme të Shtëpisë së Bardhë.
Trump mbikëqyri të mërkurën instalimin e dy shtizave flamuri në lëndinat e Shtëpisë së Bardhë, secila me një lartësi prej 30.5 metrash.Mick Mulvaney paralajmëroi se këto shtiza mund të përbëjnë problem për uljen e helikopterit presidencial. “Shoh një problem për vendin ku supozohet të ulet helikopteri, sepse kjo është pikërisht në Lëndinën Jugore, dhe nuk jam i sigurt,” tha ai për NewsNation.
Këto dy shtiza janë ndryshimi më i dukshëm i jashtëm që Trump ka bërë në Shtëpinë e Bardhë që nga kthimi i tij në detyrë.
Punonjësit gjithashtu kanë nisur të shtrijnë asfalt mbi barin në Kopshtin e Trëndafilave, dhe ka plane për ndërtimin e një salle të re vallëzimi brenda territorit të Shtëpisë së Bardhë.
Duke komentuar për rrezikun e mundshëm për uljet me helikopter, Mulvaney tha: “Mendoj se ata e kanë marrë parasysh këtë, që helikopteri do të ulet diku tjetër… por unë e shoh këtë dhe them, si shef i kabinetitt, përgjegjës për operacionet ushtarake në Shtëpinë e Bardhë, ‘ku do të ulet helikopteri pa krijuar rrezik më të lartë për presidentin e Shteteve të Bashkuara?’ Nuk e kam ende përgjigjen.”
Gjatë ceremonisë së vendosjes së shtizave të mërkurën, Trump pyeti punëtorët e ndërtimit nëse ishin emigrantë të paligjshëm dhe tha se shpresonte që të gjithë kishin votuar për të.
Ai shtoi: “Këto janë shtizat më të mira në vend apo në botë… Është një projekt shumë emocionues për mua.”
Trump tha se shtizat kushtojnë “rreth 50,000 dollarë” dhe se ai po i dhuron ato për Shtëpinë e Bardhë.
Kur u pyet se çfarë ia dha idenë për shtizat, Trump u përgjigj: “E kam pasur këtë ide prej kohësh. Edhe në mandatin e parë e kisha, por ju më sulmonit. Duhej të përqendrohesha. Unë isha i ndjekuri. Tani jam ndjekësi. Ka një ndryshim të madh.”
Trump shkroi në Truth Social të mërkurën: “Është një Nder i Madh për mua të njoftoj se do të vendos dy Shtiza të bukura Flamuri në të dy anët e Shtëpisë së Bardhë, në Lëndinat Veriore dhe Jugore. Është një DHURATË nga unë për diçka që gjithmonë ka munguar në këtë vend madhështor.
Këto janë shtizat më madhështore që janë prodhuar – janë të larta, të pjerrëta, rezistente ndaj ndryshkut, me litar të brendshëm dhe të cilësisë më të lartë. Shpresoj që të qëndrojnë krenarisht në të dy anët e Shtëpisë së Bardhë për shumë vite në vijim!”
Trump gjithashtu ka deklaruar se dëshiron të ndërtojë një sallë të re vallëzimi në Shtëpinë e Bardhë gjatë mandatit të tij. / Newsweek – Syri.net
