Pas kërcënimeve të presidentit amerikan Donald Trump, Irani i dha të Ngarkuarit me Punë të Zvicrës në Teheran, i cili është përfaqësuesi diplomatik i këtij vendi në Iran një notë për t’ia përcjellë SHBA-së, në të cilën ka njoftuar se “do t’i përgjigjet me vendosmëri dhe menjëherë çdo kërcënimi”, transmeton Anadolu.
Sipas televizionit shtetëror iranian, i Ngarkuari me Punë i Ambasadës Zvicerane u thirr në Ministrinë e Punëve të Jashtme për shkak të agresionit të vazhdueshëm të Izraelit në rajon dhe kërcënimeve të presidentit amerikan Trump për sulm.
Derisa paralajmërohet ndaj çdo veprimi të SHBA-së kundër Iranit, diplomatit zviceran iu dha një notë kundërshtimi për t’ia përcjellë SHBA-së në të cilën thuhet se Teherani do të “përgjigjej me vendosmëri dhe menjëherë” ndaj një sulmi të mundshëm.
Diplomati zviceran deklaroi gjithashtu se çështjen do t’ia përcjellë menjëherë administratës amerikane.
Çështjet diplomatike ndërmjet Teheranit dhe Washingtonit të cilat nuk kanë marrëdhënie diplomatike, kryhen përmes Zvicrës.
– Thirrjet dhe kërcënimet e Trumpit ndaj Iranit për negociata
Presidenti amerikan Trump njoftoi më 7 mars se i shkroi një letër udhëheqësit iranian Ayatollah Ali Khamenei, në të cilën kërcënon dhe bën thirrje për negociata.
Khamenei tha se SHBA-ja nuk dëshiron t’i zgjidhë problemet me kërkesë për negociata, por kërkon të imponojë kërkesat e veta dhe të vendosë dominimin dhe se Irani nuk do ta pranojë këtë.
Letra iu dorëzua Iranit nga Emiratet e Bashkuara Arabe disa ditë më vonë dhe Irani njoftoi se kishte dërguar përgjigjen e tij ndaj letrës nëpërmjet Omanit më 27 mars.
Ministri i Jashtëm iranian Abbas Araghchi tha se nuk do të zhvillojnë bisedime të drejtpërdrejta me SHBA-në për sa kohë që Trump të vazhdojë kërcënimet e tij dhe tha se janë gati për bisedime indirekte përmes ndërmjetësve. Araghchi deklaroi se në kundërshtim me kërkesat e Trumpit, ata do të zhvillojnë vetëm negociata për çështjen bërthamore dhe se çështja e kapacitetit mbrojtës të vendit të tij nuk ishte e hapur për negociata.
Trump në një deklaratë që bëri dje për median e vendit kërcënoi se do të bombardonte Iranin “në një mënyrë që nuk është parë më parë” nëse nuk arrin marrëveshje me SHBA-në.
Udhëheqësi iranian Khamenei tha se ata nuk shohin asnjë mundësi që Trump të zbatojë kërcënimet e tij për sulm, por se ata do t’i përgjigjen fuqishëm çdo sulmi.
