Ministri i Brendshëm, Xhelal Sveçla, ka thënë se nuk e dinë se ku po mbahen tre policët që janë kidnapuar brenda territorit të Kosovës.
Ai shtoi se Serbia është vend jodemoraktik, që nuk brengoset për liritë dhe të drejtat e të burgosurve, raporton Ekonomia Online.
Sveçla tha se po presin që KFOR-i, misioni paqeruajtës i NATO-s të dalë publikisht me qëndrim për atë se çfarë ndodhi dje. Ai shtoi se pas kidnapimit të tre policëve në veri, Policia është e gatshme t’i përgjigjet “çfarëdo sfide”.
“Prandaj nuk dimë se ku janë duke u mbajtur policët. Serbia qartazi është një vend jo demokratik dhe nuk brengoset fort as për liritë dhe të drejtat e të burgosurve, as për familjarët e tyre, as për fqinjësi të mirë, as për de-eskalim të situatës aktuale”.
“Gjitha këto informata janë duke u ndarë në vazhdimësi me partneret tanë, edhe kur isha aty, kishte pjesëtarë të KFOR-it, të cilët poashtu hetonin rastin, mund të them që për sa i takon terrenit, të dhënat po na përputhen, por presim deklarim zyrtar të tyre. Gjurmët tregojnë që ka qenë aksion i këtyre dy njësive speciale me numër shumë më të madh sesa që ju i keni parë apo se sa pjesëtarët e policisë tonë kanë qenë aty”.
“Presim të dalin publikisht me qëndrimin e tyre për atë çfarë ka ndodhë”, tha Sveçla në një konferencë të përbashkët me kryeministrin Albin Kurti.
“Sidomos pas këtij rasti, gatishmëria e Policisë është në nivel shumë më të lartë. Unë besoj që janë të gatshëm t’i përgjigjen çfarëdo sfide dhe po punojmë që këto sfida apo rreziqe t’i minimizojmë”, tha ai.
