Prokuroria Themelore Publike Shkup ka lëshuar urdhër për zhvillimin e procedurës hetimore ndaj një 29-vjeçari nga Kumanova, i cili së bashku me persona të tjerë të panjohur kanë fshehur një sasi të madhe të armëve të zjarrit dhe municionit në një kanal pranë rrugës lokale në mes fshatrave Orllancë dhe Nikushtak.
“Më 18 dhjetor, policia gjeti një mitraloz, disa kallashnikov, korniza dhe një numër të madh fishekësh, të ndaluara për qytetarët dhe për të cilat civilët nuk mund të marrin leje.
Me veprime shtesë hetimore me urdhër të prokurorit publik, janë zbuluar gjurmë materiale të cilat krijojnë dyshim të bazuar se ky i dyshuar dhe disa persona të tjerë në identifikimin e saktë të të cilëve po punohet, armët i kanë mbajtur në mënyrë të kundërligjshme në vendin e caktuar.
“Me këtë i dyshuari ka kryer vepër penale – Prodhim, posedim, ndërmjetësim dhe tregtim i paautorizuar i armëve apo lëndëve shpërthyese nga neni 396 paragrafi 5 në lidhje me paragrafin 3 të Kodit Penal”, thonë nga Prokuroria.
Sektori i Punëve të Brendshme në Shkup mbrëmë njoftoi se e ka zbardhur rastin me armët e gjetura në Haraçinë të Shkupit, dhe siç mund të kuptohet, është shqiptuar 30 ditë paraburgim për H.S.
“Janë gjetur 9 kallashnikovë, 1 mitraloz dhe sasi të madhe municioni. Pas ndërmarrjes së masave përkatëse e aktiviteteve dhe ekspertizave të ndërmarra, është konstatuar se arma është e H.S.(29) nga Kumanova”, thuhet në njoftimin e SPB Shkup.
