Ish-kryeministri Nikolla Gruevski ka thënë se Zoran Zaev po investon në ndërtimin e një kulle me 82 kate në Dubai, me vlerë mbi 600 milionë euro.
“Ai ndoshta për momentin është shumë krenar me veten në këto ditë, kur sipas informacioneve ka filluar ndërtimi i një kulle me 82 kate në Dubai, një investim prej mbi 600 milionë euro.”
Shumica e parave për këtë investim janë përvetësuar përmes zhvatjes masive, si kurrë më parë në historinë e Maqedonisë, dhe përmes keqpërdorimit të pushtetit gjatë qeverisjes së tij. Paratë në dorë janë transferuar me avion privat në Dubai dhe janë depozituar në një llogari bankare.
Njëkohësisht, ai po përgatitet edhe për një investim të madh në një tjetër shtet në Azi, i inkurajuar nga ideja se ka zgjidhur të gjitha çështjet për të siguruar pandëshkueshmërinë e tij në çdo aspekt. Por ky njeri, që shtiret si besimtar, i lig dhe i etur për para, duhet ta dijë se ka shumë njerëz në ndërgjegjen e tij,” shkroi Gruevski në Facebook.
Në një deklaratë për “Sloboden Peçat”, Zaev i mohoi këto pretendime të Gruevskit.
“Sa i çmendur duhet të jetë një njeri për të thënë dhe pohuar budallallëqe të tilla. Njerëzit e mbushur me ego vetëm presin të kapen pas gënjeshtrave të tilla për të shëruar krenarinë e tyre të lënduar. Familja Zaev punëson mbi 1.000 njerëz në Maqedoni.
Kështu ka qenë para se të hyja në politikë, kështu ka qenë gjatë kohës që isha në politikë, dhe kështu është tani, më shumë se tre vjet pasi jam larguar përfundimisht nga politika. Nuk po ndërtoj asnjë kullë në Dubai, kjo është një gënjeshtër e plotë,” tha ai.
