- Presidenti i Shteteve të Bashkuara, Donald Trump, ka nënshkruar një sërë dekretesh ekzekutive që synojnë rigjallërimin e industrisë bërthamore amerikane, në një përpjekje për të përballuar rritjen e ndjeshme të kërkesës për energji në vend. Që në ditën e parë të mandatit të tij të ri, Trump shpalli gjendje të jashtëzakonshme energjetike, duke e lidhur situatën me ndikimin në rritje të inteligjencës artificiale në konsumin energjetik.
Dekretet përfshijnë lehtësimin e procedurave për miratimin e reaktorëve të rinj dhe forcimin e zinxhirëve të furnizimit me karburant bërthamor. Për të përshpejtuar zhvillimet, administrata Trump ka ndërmarrë një ristrukturim të thellë të Komisionit Rregullator Bërthamor dhe ka udhëzuar bashkëpunim të ngushtë ndërmjet Departamentit të Energjisë dhe Departamentit të Mbrojtjes për ndërtimin e centraleve në toka federale.“Me këto veprime, Presidenti Trump i dërgon një mesazh botës: Amerika do të rindërtohet dhe rilindja bërthamore amerikane mund të nisë,” deklaroi Michael Kratsios, drejtor i Zyrës për Politikën Shkencore dhe Teknologjike të Shtëpisë së Bardhë.
Në SHBA, procesi i licencimit të reaktorëve mund të zgjasë mbi një dekadë, duke penguar zhvillimin e impianteve të reja, ndonëse ky është projektuar për të garantuar siguri maksimale. Dekretet e reja synojnë të kapërcejnë këto pengesa përmes një qasjeje më të drejtpërdrejtë dhe të centralizuar.
Një aspekt kyç i paketës së dekreteve është rigjallërimi i prodhimit dhe pasurimit të uraniumit në territorin amerikan, duke u përqendruar në forcimin e pavarësisë energjetike të vendit. Ndërsa më herët Trump ka favorizuar industrinë e karburanteve fosile, administrata e tij tani i ka hapur rrugë edhe energjisë bërthamore, një teknologji që po fiton mbështetje gjithnjë e më të gjerë si nga republikanët ashtu edhe nga demokratët.
Mbështetësit e energjisë bërthamore në të majtë e shohin atë si një alternativë pa emetime ndaj lëndëve djegëse tradicionale, ndërsa republikanët e konsiderojnë të rëndësishme për sigurinë kombëtare dhe pavarësinë energjetike. Megjithatë, ambientalistët paralajmërojnë për rreziqet që lidhen me mbetjet radioaktive dhe sigurinë e reaktorëve.
Me këtë lëvizje, Trump vendos bazat për një debat të ri mbi rolin e energjisë bërthamore në të ardhmen energjetike të SHBA-ve.
