Forcat izraelite kanë bombarduar kryeqytetin jemenas, Sanaa, sipas zyrtarëve izraelitë dhe jemenas, ndërsa tensionet në rajon vazhdojnë të rriten për shkak të luftës në Gaza.
Sipas televizionit Al Masirah, i lidhur me Houthi-t, sulmi i së dielës, 24 gusht, kishte si objektiv një impiant nafte dhe një central elektrik në Sanaa. Izraeli tha se sulmet përfshinin edhe një pallat presidencial, të cilin e cilësoi pjesë të një “kompleksi ushtarak”. Të paktën dy persona humbën jetën dhe 35 të tjerë u plagosën, sipas raportimeve të Al Masirah.
Sulmet izraelite erdhën dy ditë pasi Houthi-t pretenduan se kanë lëshuar një raketë drejt Izraelit, pjesë e një fushate për të ndaluar mizoritë dhe bllokadën në Gaza.“Forcat izraelite kryen sulmet si përgjigje ndaj sulmeve të përsëritura nga regjimi terrorist Houthi ndaj shtetit të Izraelit dhe qytetarëve të tij, përfshirë raketat tokë-tokë dhe pajisjet ajrore drejt territorit tonë,” tha ushtria izraelite.
Një zyrtar ushtarak Houthi deklaroi për Al Masirah se mbrojtja ajrore e grupit arriti të “neutralizonte shumicën e avionëve izraelitë pjesëmarrës në agresion dhe i detyroi të largoheshin”.
Pamjet e verifikuara nga Al Jazeera treguan flakë dhe tym që ngrihej mbi Sanaa pas sulmeve izraelite. Houthis theksuan se sulmet nuk do t’i pengojnë operacionet ushtarake për të mbështetur Palestinën.
“Agresioni izraelit ndaj Jemenit nuk do të na ndalojë të vazhdojmë mbështetjen për Gaza, pavarësisht sakrificave,” tha zyrtari Houthi, Mohammed al-Bukhaiti. Zyrtari tjetër i Ministrisë së Mbrojtjes Houthi, Abed al-Thawr, akuzoi Izraelin për bombardimin e infrastrukturës civile dhe e quajti sulmin “barbarizëm”. Ai tha se pallati presidencial që u godit ishte prej kohësh i braktisur.
Qeveria e udhëhequr nga Houthi në Sanaa e cilësoi sulmin izraelit një “krim lufte” që synon të dëmtojë popullin jemenas dhe të krijojë një “fitore të rreme” me kolonat e tymit mbi qytet. Sulmet izraelite në impiantet elektrike dhe portet e Jemenit kanë vazhduar për më shumë se një muaj, ndërsa këtë javë forcat detare izraelite goditën një central tjetër në Sanaa.
Të premten, Houthi-t thanë se kishin lansuar një raketë hipersonike dhe dy dronë ndaj Izraelit, duke premtuar të qëndrojnë pranë Palestinës “deri sa të ndalojë agresioni ndaj Gazës dhe të hiqet bllokada”.
