I dërguari special i SHBA-së për Ballkanin Perëndimor, Gabriel Escobar, ka thënë se plani evropian për Kosovën është i mirë. Ai ka theksuar se kryeministri i Kosovës, Albin Kurti, “do ta humbë mundësinë” nëse nuk pajtohet që ta implementojë dhe harmonizojë me partnerët.
Kosova dhe Serbia pranuan planin evropian për dialogun e edhe marrëveshjen për udhërrëfyen mbi zbatimin e tij muaj më parë.
Escobar ka folur në Zagreb para Forumit të Dubrovnikut, ku ka thënë se tensionet e vazhdueshme në veri të Kosovës e kanë kërcënuar këtë plan.
Ai ka thënë se ka pasur “indikacione pozitive” se Beogradi mund ta pranojë, por se nuk mund ta thotë të njëjtën edhe për Kurtin.
“Ne shpresojmë se Kurti në një pikë do t’i përmbushë kërkesat evropiane dhe amerikane”.
I pyetur se çfarë pasoja mund të ketë për Kosovën dhe nëse njëra prej tyre do të ishte tërheqja e KFOR-it nga Kosova, Escobari u përgjigj se kjo mundësi “nuk është në tavolinë”, raportoi Hina.
“Partneriteti ynë me Kosovën është partneritet me popullin e Kosovës, jo me një parti apo figurë politike”.
Ai theksoi se pasojë e mospranimit të planit evropian është një mundësi e humbur.
“Kjo nuk është një masë ndëshkuese, është një mundësi e humbur. Kjo është ajo që po ndodh me Kosovën tani sepse nuk po koordinohet me partnerët e saj”, shtoi Escobar.
