(Lajm i përditësuar)
Thaçi: Familjarët e Faton Hajrizit e kanë identifikuar trupin e pajetë
Drejtori i Departamentit të Laboratorëve në Institutin e Mjekësisë Ligjore, Agron Thaçi, ka konfirmuar se familjarët e Faton Hajrizit e kanë identifikuar trupin e tij.
Thaçi tha se rreth orës 13:00 do të bëhet autopsia e të ndjerit dhe pas procedurave do të dorëzohet tek familjarët.
Ai potencoi se për shkak të ndjeshmërisë së rastit dhe rrethanave është formuar një komision tre anëtarësh prej ekspertëve mjekoligjorë që do të kryhet autopsia.
“Mbrëmë rreth orës 1 është pranuar trupi i pajetë i cili është i Faron Hajrizt. Këtë po e deklarojmë pas urdhëresës që është bërë nga prokurori përgjegjës. Është identifikuar nga familjarët e rastit në praninë e mjekut kujdestar…Për shkak të ndjeshmërisë së rastit dhe rrethanave në konsultim me drejtorin e përgjithshëm kemi formuar një komision tre anëtarësh prej ekspertëve mjekoligjorë që do të kryhet autopsia. Do të fillojë rreth orës 13:00 në prani të prokurorit dhe familjarëve…Ne pranojmë urdhëresë nga prokurori, në basë të asaj urdhërese edhe kryejmë autopsinë…Raporti i autopsisë varet, mirëpo trupi i pajetë pas kryerjes së autopsisë mund t’i dorëzohet familjarëve”, tha Thaçi.
Autopsia e personit të vrarë në Lloznicë pritet të bëhet sot
Pas sjelljes së trupit të personit të vrarë në Lloznicë të Serbisë, në Institutin e Mjekësisë Ligjore(IML) në orët e para të mëngjesit të sotëm, familjarët e tij së bashku me zyrtarët e IML-së dhe hetuesit janë parë në objektin i IML-së.
KP merr vesh se autopsia e trupit të pajetë pritet të bëhet sot. Ndërkaq, Ministria e Punëve të Jashtme dhe Diasporës (MPJD) e ka konfirmuar zyrtarisht se trupi i pajetë i personit të vrarë në Lloznicë të Serbisë tashmë ka mbërritur në Kosovë.
MPJD-ja ka bërë të ditur se institucionet përkatëse po kryejnë procedurat e mëtejshme mjeko-ligjore për identifikimin dhe verifikimin e tij.
