Kryeshefi i Policisë së Gostivarit, Abdil Bilalli, ka dhënë sot dorëheqjen nga posti i tij, një hap që vjen si pjesë e vendimeve politike brenda radhëve të Aleancës për Shqiptarët, krahu i drejtuar nga Arben Taravari.
Përmes një deklarate të gjatë publike, Bilalli theksoi se largimi i tij nuk është dorëheqje nga përgjegjësia, por një akt dinjiteti dhe bindjeje politike.
“Ne kemi marrë një vendim që nuk është i lehtë, por është i ndershëm: kemi vendosur të heqim dorë nga postet tona zyrtare. Kjo nuk është një dorëheqje nga përgjegjësia, por një dëshmi se për ne pushteti nuk është qëllim në vetvete,” – u shpreh ai.
Në mesazhin e tij publik, Bilalli falënderoi qytetarët e Gostivarit për përkrahjen gjatë mandatit të tij pesëmujor, duke theksuar se gjatë kësaj kohe ka punuar me përkushtim dhe ndershmëri.
“Gjatë pesë muajve të plotë që udhëheqa, jam mahnitur nga kultura që kanë treguar gostivarasit. Një falënderim i veçantë shkon për fshatin tim, Çegranin – të cilët kanë qenë pranë meje në çdo kohë,” tha Bilalli.
