Mosab Hassan Yousef, djali i një themeluesi të Hamasit (Sheikh Hassan Yousef), sulmoi organizatën terroriste dhe mbështetësit e saj perëndimorë në emisionin “Uncensored” të moderatorit të njohur anglez, Piers Morgan.
I njohur gjithashtu si “Princi i Gjelbër”, Yousef u shfaq pas një morie të ftuarish të tjerë palestinezë që ishin ftuar për të dhënë perspektivat e tyre mbi luftën Izrael-Hamas.
Masakra e kryer nga Hamasi ndaj izraelitëve, një populli të ngarkuar me trauma nga Holokausti, “hapi portat e ferrit mbi popullin palestinez”, duke demonstruar gatishmërinë e Hamasit për të sakrifikuar fëmijët dhe civilët palestinezë, tha Yousef.
“Ky është mesazhi im si ish-anëtar i Hamasit, si biri i njërit prej themeluesve të Hamasit: mjaft! Nëse nuk i ndalojmë tani, lufta e ardhshme do të jetë më vdekjeprurëse”.
Yousef ka folur prej kohësh publikisht për përvojat e tij duke u rritur në qytetin Ramallah të Bregut Perëndimor si djali i Hassan Yousef, një bashkëthemelues i Hamasit; duke u burgosur dhe duke u bërë një informator dhe më vonë avokues i Izraelit.https://zeri.info/inarticle.html
Autobiografia e tij e vitit 2010, “Biri i Hamasit” dhe adaptimi i mëvonshëm i filmit, “Princi i Gjelbër”, (e gjelbra është ngjyra e Hamasit) detajon këto përvoja.
Ai ka folur gjithashtu për mediet në disa raste, duke përfshirë fjalimin e tij në Konferencën Vjetore të Jerusalem Post 2019, dhe për OJQ-të si fjalimi i tij i vitit 2017 në një debat të Këshillit të të Drejtave të Njeriut të Kombeve të Bashkuara për UN Watch.
Morgan hapi bisedën duke e pyetur Yousef se cilat ishin qëllimet e Hamasit kur u krijua dhe në fillet e saj.
“Hamasi do vetëm shkatërrimin e Izraelit”
“Që nga themelimi i saj, Hamasi ka [kishte] një qëllim në mendje, që është asgjësimi i Shtetit të Izraelit”, tha Yousef. Ai vazhdoi duke thënë: “Nuk është sekret që Hamasi dëshiron të shkatërrojë Shtetin e Izraelit. Ata nuk mund ta pranojnë Izraelin apo të pranojnë të drejtën e Izraelit për të ekzistuar”.
Lidhur me masakrën e Hamasit në jug të Izraelit më 7 tetor, Yousef tha se ndërsa ishte zënë në habi nga shkalla e sulmit, ai nuk ishte i befasuar nga brutaliteti i Hamasit.
Në përgjigje të një pyetjeje të mëvonshme në lidhje me atë pjesë të palestinezëve të Gazës që simpatizonin ose mbështesnin Hamasin, aktivisti palestinez pohoi se kur Hamasi të përmbytet përfundimisht, jo vetëm që Gazanët do të festonin, por ata do ta falënderonin Izraelin për këtë.
Morgani më vonë pyeti për përgjigjen e Yousefit ndaj aktivistëve pro-palestinezë që fajësojnë Izraelin për konfliktin.
“Që nga fëmijëria ime, kam dëgjuar histori nga [ata që janë] pro-palestinezët dhe nga ata që përdorin të ashtuquajturën ‘kauza palestineze’. Ata kujdesen më së paku për fëmijët palestinezë dhe të ardhmen e tyre. Unë jam përfaqësuesi legjitim i fëmijëve palestinezë. Fëmija brenda meje flet!”.
Në një referencë të qartë ndaj të ftuarve mbështetës të Hamasit, të cilët u shfaqën në programet e mëparshme të emisionit të Piers Morgan, të tillë si predikuesi islamik i YouTube, Mohammad Hijab dhe reperi britanik Lowkey, Yousef shtoi: “Unë nuk dua që dikush të vijë nga Londra ose dikush nga ana tjetër e botës për të më thënë se cila është beteja ose vuajtja e fëmijëve palestinezë.
Fëmijët palestinezë, shoqëria palestineze janë rrëmbyer nga këta kriminelë dhe kushdo që mban anën e tyre merr pjesë në krimet e tyre”.
Ai e bëri dallimin ndërmjet mënyrave të luftimit nga ana e Izraelit dhe nga ana e Hamasit, duke vënë në dukje se ndërsa Hamasi përdor mburoja njerëzore dhe vendos postblloqe për të parandaluar ikjen e civilëve, Izraeli kërkon të paralajmërojë Gazanët përpara se të ndodhë një sulm ajror.
“Ne nuk kemi nevojë për një regjim tjetër të korruptuar arab”
“Mjaft gjakderdhje dhe mjaft përfshirje nga njerëz që nuk u intereson se çfarë po ndodh. Ata janë vetëm luftëtarë në tastierë. Ata thjesht po sulmojnë kryeqytetet botërore duke thënë: “Liro Palestinën!” Palestina e lirë!’ Ata nuk e dinë se çfarë dreqin është Palestina! Unë jam Palestina! Dhe ajo që them është ‘mjaft, Hamas!’”, tha ai.
“Ne nuk duam një shtet palestinez, unë nuk dua një shtet palestinez. Fëmijët palestinezë kanë nevojë për arsim, kanë nevojë për siguri, kanë nevojë për jetë. Kjo është ajo që ata kanë nevojë, ata nuk kanë nevojë për një regjim tjetër të korruptuar arab”.
Morgan më pas pyeti nëse izraelitët po merrnin rrugën më të mirë të veprimit ose nëse sulmet ajrore dhe pushtimi i ardhshëm tokësor rrezikonin të radikalizonin më shumë të rinj palestinezë.
“Dëgjo”, tha Yousef.
“Ne do ta largojmë Hamasin nga pushteti. Mbaji mend fjalët e mia. Hamasi nuk solli vetëm zemërimin e Izraelit mbi Gazën. Hamasi solli zemërimin e Zotit. Ne do t’i heqim nga pushteti dhe do t’i ndjekim liderët e tyre dhe do t’i nxjerrim para drejtësisë. Dhe bota do të jetë dëshmitare e ndëshkimit të tyre dhe kushdo që mban anën e tyre sot, në këtë gjendje konfuzioni, duke menduar se kjo është një shaka, unë u them atyre njerëzve se do të pendoheni që keni marrë anën e Hamasit. Do të pendoheni që keni marrë anën e atyre kriminelëve që po vrasin popullin palestinez”. /Zëri
