DËRGOHET NË BURGUN 313 ISH-MINISTRI I BRENDSHËM, SAIMIR TAHIRI
Gjykata e Posaçme e Apelit për Korrupsionin dhe Krimin e Organizuar dënoi me 3 vjet e 4 muaj burg ish-ministrin e Brendshëm, Saimir Tahiri për shpërdorim të detyrës në lidhje me kushërinjtë e tij narkotrafikantë Habilaj nga Vlora.
Zoti Tahiri, i cili dërgua fillimisht në Policinë e Tiranës dhe mandej te burgu 313, reagoi me një postim në tuiter duke e quajtur vendimin një padrejtësi të madhe, raportoi korrespondenti i RTK-së Denion Ndrenika.
Ish-ministri i Brendshëm më jetëgjatë i Shqipërisë, u akuzua për trafik droge dhe pjesëmarrje në grup kriminal, por u dënua nga gjykata për “shpërdorim detyre” me 3 vite shërbim prove.
Pas thuajse një dite të tërë në seancë gjyqsëore, Apeli i Posaçëm pasi e kishte rikthyer në rishqyrtim dosjen e ish-ministrit Tahiri për parregullsi në proces, vendosi ta heqë shërbimin e provës për ta dënuar me 3,4 vjet duke e dërguar menjëherë në burgun e sigurisë së lartë 313 në Tiranë.
Ish-ministri i Brendshëm u përmend nga hetimet e antimafias italiane në 2017 kundër narkotrafikantëve të vëllazërisë Habilaj për marihuanë dhe armë.
Ndonëse ish-Prokuroria për Krime të Rënda, sot Prokuroria e Posaçme kundër Korrupsionit dhe Krimit të Organizuar SPAK, kërkoi arrestimin e zotit Tahiri, shumica socialiste e kryeministrit Edi Rama nuk e lejoi.
