Më 3 maj të këtij viti shënohet edhe tridhjetëvjetori i Ditës Botërore të Lirisë së Medias. Agresioni brutal i Rusisë kundër Ukrainës dhe pasojat shkatërruese të të gjitha formave të luftës hibride kundër demokracisë në Evropë dhe në botë nxjerrin në pah rëndësinë e medias më shumë se kurrë më parë.
Ky jubile e mirëpret Maqedoninë e Veriut me një tjetër kërcim të indekseve. Lajmi i mirë është se vendi ynë ka kaluar 19 vende në indeksin e Reporterëve pa Kufij. Megjithatë, ka pak arsye për gëzim në këtë ditë.
Me të drejtë, OKB-ja po e feston këtë vit me temën “Formimi i së ardhmes së të drejtave: Liria e shprehjes si shtytës për të gjitha të drejtat e tjera të njeriut”. Është e vërtetë që rritja e mediave të pavarura dhe zhvillimi i teknologjive dixhitale kanë mundësuar rrjedhjen e lirë të informacionit në botë. Megjithatë, liria e medias, siguria e gazetarëve dhe liria e shprehjes janë gjithnjë e më shumë nën sulm. Ajo ndikon fuqishëm në realizimin e të gjitha të drejtave dhe lirive të njeriut.
CIVILI e rithekson qëndrimin se dezinformimi dhe propaganda cenojnë të drejtat e njeriut të shprehura në Ditën Ndërkombëtare të të Drejtave të Njeriut, 10 Dhjetor 2022:
Dezinformimi dhe propaganda vrasin. Ato shkaktojnë mosbesim në institucione, polarizim, pasiguri, frikë, tension dhe dhunë. Me kërcënimet ndaj mediave, qendrat e pushtetit i shkaktojnë dëme të pariparueshme ekonomisë, politikës, jetës së përgjithshme socio-politike në shoqëri, stabilitetit dhe sigurisë së shtetit.
Qëndrimi i CIVIL-it se korrupsioni “mbrohet” në mënyrë më efektive me dezinformata dhe propagandë, buron nga monitorimi afatgjatë i kushteve dhe proceseve në vend, përfshirë edhe proceset zgjedhore.
Nga ana tjetër, organizata thekson vazhdimisht gjatë viteve të kaluara se lufta për drejtësi është luftë kundër korrupsionit. Në këtë dhe në një kontekst më të gjerë, angazhimet për të drejtat dhe liritë e njeriut, për paqen, drejtësinë dhe përparimin në shoqëri, varen drejtpërdrejt nga angazhimet për lirinë e shprehjes dhe liritë e medias.
Dezinformimi dhe propaganda janë arsyeja kryesore pse shkeljet e të drejtave dhe lirive të njeriut mbeten të pandëshkuara. Dëshmi tragjike e këtij pretendimi është fakti se krimet e luftës dhe gjenocidi “mbrohet” pikërisht me dezinformata dhe propagandë.
Qendrat e propagandës bëjnë gjithçka për të përçmuar dhe diskredituar individë, media dhe organizata që punojnë për promovimin e vlerave evropiane, antinacionalizmit, drejtësisë, barazisë dhe të drejtave të njeriut. Në mbarë botën, regjimet militante dhe diktatoriale nuk përmbahen nga persekutimi dhe vrasja e gazetarëve. Viti i kaluar regjistroi një rekord të zi: të paktën 67 të vrarë dhe të paktën 568 gazetarë të burgosur, sipas raportit të Reporterëve pa Kufij.
Puna jonë është në kundërshtim të drejtpërdrejtë me gjithçka që përfaqësojnë qendrat e pushtetit që gjenerojnë dhe tregtojnë dezinformata dhe propagandë. Prej vitesh ata kanë zhvilluar një fushatë të ashpër dhe të errët kundër atyre që mbrojnë të drejtat dhe liritë e njeriut.
CIVILi si organizatë civile vepron në drejtim të mbrojtjes së të drejtave të njeriut, drejtësisë dhe vlerave të përgjithshme njerëzore. Platforma mediale e CIVIL-it është burim informacioni, raportesh dhe analizash relevante, si dhe është një platformë në të cilën zhvillohet dialogu dinamik social dhe politik. Pikërisht këto janë arsyet pse – si CIVIL ashtu edhe media brenda organizatës – janë nën sulmin e vazhdueshëm të propagandës, pikërisht për shkak të atyre vlerave dhe për shkak të frymës gjithëpërfshirëse progresive që mbizotëron në punën e saj mediatike.
Prandaj, në 30-vjetorin e Ditës Botërore të Lirisë së Shtypit, është e rëndësishme të shohim faktet, sado të dhimbshme apo të errësuara nga propaganda. Mediat janë në vijën e parë të mbrojtjes së të drejtave dhe lirive të njeriut! Krimet e luftës, korrupsioni dhe krimi “mbrohet” me dezinformim.
CIVIL
