Presidenti i Bjellorusisë, Alexander Lukashenko, ka konfirmuar se qeveria e tij po merr pjesë në luftën në Ukrainë, duke mbështetur Rusinë.Gjatë shtatë muajve të luftës, ekzekutivi bjellorus kishte bërë një përpjekje për të sqaruar shkallën e përfshirjes së tij në ofensivën ushtarake të orkestruar nga Putin. Megjithatë, sot Bjellorusia pranon se po merr pjesë në luftë.
“Ne po marrim pjesë në të. Nuk e fshehim. Por, ne nuk kemi vrarë askënd, nuk kemi dërguar ushtarë askund”, tha Lukashenko, i cili shpjegoi se përfshirja e Bjellorusisë është “e kufizuar” për momentin, vetëm për të “parandaluar përhapjen e konfliktit në territorin bjellorus” ose për të parandaluar një sulm të mundshëm nga Polonia, Lituania dhe Letonia.
Presidenti bjellorus ka theksuar se për momentin “nuk ka asnjë emergjencë” që prek Bjellorusinë, por ai e ka bërë të qartë se është në anën e Rusisë në atë që ai e ka përshkruar gjithashtu si një “operacion të veçantë ushtarak”.Sipas Lukashenkos, Ukraina ka 15 000 trupa në kufi dhe ka pajisje vëzhgimi që ndonjëherë shkelin hapësirën ajrore të Bjellorusisë: “Ata gjoja janë shumë të shqetësuar për hyrjen e Bjellorusisë në luftë dhe në të njëjtën kohë vazhdojnë provokimet në kufi”.
Presidenti bjellorus, përveç kësaj, ka kritikuar edhe “politikanët perëndimorë” për deklaratat e tyre “cinike” në lidhje me ofensivën e Rusisë në Ukrainë. Në këtë kuptim, Lukashenko ka akuzuar Shtetet e Bashkuara se po përpiqen të heqin qafe Rusinë dhe aleatët e saj në mënyrë që të fokusohen te Kina.
