Presidenti i SHBA-së, Joe Biden, ka uruar Kosovën për 15 vjetorin e pavarësisë.
Në urimin e tij dërguar presidentes Vjosa Osmani, Bideni ka thënë se e mirëpret faktin që Kosova e ka përqafuar planin evropian mbi normalizimin e raporteve me Serbinë, “me qëllimin eventual njohjen reciproke”.
“Mirëpresim përqafimin tuaj të propozimit të BE-së për normalizim, me qëllimin eventual të njohjes së ndërsjellë, e cila do të ndihmojë në sigurimin një të ardhmeje më të sigurt dhe më paqësore për popullin në Kosovë dhe Serbi”, thuhet mes tjerash në urimin e presidentit amerikan drejtuar homologes Vjosa Osmani.
Më tej, në letër thuhet: “Në emër të popullit të Shteteve të Bashkuara, ju dërgoj urimet tona më të mira për ju dhe popullin e Kosovës, gjersa shënoni 15 vjetorin e pavarësisë së vendit tuaj. Përgjatë viteve të fundit, Kosova dhe Shtetet e Bashkuara kanë forcuar institucionet demokratike për të ofruar në mënyrë të barabartë efektive qeverisje të mirë, sundim të ligjit dhe mundësi për qytetarët në të dy vendet tona”, ka thënë Presidenti Biden.
Ndër të tjera, Presidenti Biden ka shprehur mbështetje për integrimin e Kosovës në institucionet euroatlantike, si dhe për dialogun me Serbinë.
Më poshtë, gjejeni të plotë urimin e Bidenit në gjuhën shqipe dhe origjinal në anglisht:
E nderuara Zonja Presidente,
Në emër të popullit të Shteteve të Bashkuara, ua dërgoj urimet tona më të mira juve dhe popullit të Kosovës teksa kremtoni 15-vjetorin e pavarësisë së vendit tuaj.
Gjatë disa viteve të fundit, Kosova dhe Shtetet e Bashkuara kanë forcuar institucionet demokratike për të ofruar në mënyrë të barabartë dhe efektive qeverisje të mirë, sundim të ligjit dhe mundësi për qytetarët në të dy vendet tona. Së bashku, ne kemi mbrojtur vlerat tona të përbashkëta, duke përfshirë mbështetjen e popullit të Ukrainës ndërsa ata mbrojnë veten kundër agresionit të padrejtë dhe të paprovokuar të Rusisë. Shtetet e Bashkuara do të vazhdojnë të mbështesin integrimin e Kosovës në institucionet euroatlantike dhe Dialogun e lehtësuar nga BE-ja për normalizimin e marrëdhënieve me Serbinë. Ne mirëpresim miratimin tuaj të propozimit të BE-së për normalizimin, me qëllimin eventual të njohjes reciproke, e cila do të ndihmonte në sigurimin e një të ardhmeje më paqësore dhe më prosperuese për popullin e Kosovës dhe Serbisë.
Në vitin e ardhshëm – ndërsa Kosova vazhdon të zhvillohet dhe të përparojë si një vend multietnik, sovran dhe i pavarur – mezi pres të forcojmë partneritetin tonë dhe të thellojmë edhe më tej miqësinë tonë.
Sinqerisht,
Joseph R. Biden Jr.
