Punëtorët në Belgjikë së shpejti do të mund të zgjedhin një javë pune katërditore, pas një sërë reformash në tregun e punës, raporton Euronews.
Paketa e reformës e rënë dakord nga qeveria e koalicionit shumëpartiak të vendit do t’u japë gjithashtu punëtorëve të drejtën të fikin pajisjet e punës dhe të shpërfillin mesazhet e lidhura me punën pa frikën e hakmarrjes.
“Kemi pasur dy vite të vështira. Me këtë marrëveshje, ne kemi vendosur një ‘fener’ për një ekonomi më inovative, të qëndrueshme dhe dixhitale. “Qëllimi është që njerëzit dhe bizneset të bëhen më të fortë.”
Punëtorët e pavarur do të marrin gjithashtu mbrojtje më të fortë ligjore sipas rregullave të reja, ndërsa punonjësit me kohë të plotë do të mund të punojnë në një orar fleksibël sipas kërkesës së tyre.
Megjithatë, futja e reformës së ligjit mund të marrë muaj, pasi projektligji duhet të kalojë disa lexime nga ligjvënësit federalë përpara se të miratohet.
Një pjesë e rëndësishme e reformave të reja të punës në Belgjikë ndikojnë në balancën punë-jetë të punonjësve si në sektorin publik ashtu edhe në atë privat.
Projekt-paketa e reformës e rënë dakord nga qeveria federale e vendit do t’u japë punonjësve mundësinë të kërkojnë një javë pune katër-ditore.
“Kjo duhet të bëhet me kërkesën e punonjësit dhe punëdhënësi do të japë arsye të forta për çdo refuzim,” tha në një konferencë shtypi ministri belg i Punës Pierre-Yves Dermanj.
Një zëdhënës i qeverisë për Euronews konfirmoi se punonjësit do të mund të aplikojnë për katër ditë në javë për një periudhë prej gjashtë muajsh. Pas kësaj, ata mund të zgjedhin të zgjasin marrëveshjen ose të kthehen në javën pesëditore të punës pa asnjë pasojë negative.
“Periudha gjashtëmujore zgjidhet në mënyrë që një punonjës të mos ngecë për një kohë të gjatë në rast të zgjedhjes së gabuar”, thonë ata.
