Avokati i ish-presidentit të Kosovës Hashim Thaçi në Gjykatën Speciale në Hagë, Luka Misetiq është shprehur i bindur në pafajësinë e klientit të tij. Ai ka deklaruar se provat kundër Thaçit janë jashtëzakonisht të dobëta, derisa ka shfaqur besimin se edhe trupi gjykues ka përshtypje të njëjtë, sikurse mbrojtja.Qe katër vjet e gjysmë, Hashim Thaçi dhe ish-krerët tjerë të UÇK-së gjenden në paraburgim të Dhomave të Specializuara në Hagë.
Por, sipas avokatit të ish-presidentit të Kosovës, dy vjet e gjysmë gjykim kanë dëshmuar pafajësinë e tij.
Kroati Luka Misetiq, në një paraqitje publike në Hagë, ka thënë se në fund të gjykimit do të dëshmohet se pretendimet e Dick Martyt nuk kanë gati asnjë lidhje me provat që Prokuroria i ka paraqitur kundër Thaçit.
“Për mendimin tonë, provat kundër Z. Thaçi janë jashtëzakonisht të dobëta deri në atë pikë që ndonjëherë gjatë procesit e pyes veten “pse është akuzuar fillimisht Z. Thaçi?”. Do t’i dorëzojmë parashtresat tona Trupit Gjykues në kohën e duhur por nuk ka shumë gjëra që mund të them për prova specifike të rastit, por jemi të bindur për rezultatin për Z. Thaçi dhe e vetmja gjë që ka mbetur tani është të kalojmë nëpër fazat tjera të procesit sa më shpejt dhe ta kemi aktgjykimin sa më parë të jetë e mundur”, ka thënë Luka Misetiq, Avokat i Hashim Thaçit.
Misetiq ka shfaqur besimin se vlerësim sikur të mbrojtjes ka edhe trupi gjykues.
“Çështja e cila është paraqitur nga ana e Z. Thaçi në fjalën hyrëse rreth rolit të tij në Ushtrinë Çlirimtare të Kosovës është vërtetuar përgjatë çështjes së Prokurorisë dhe tani neve na ka mbetur vetëm t’i argumentojmë këto para Trupit Gjykues. Kemi besimin se Trupi Gjykues e ka të njëjtën përshtypje për këtë rast sikur që e kemi ne dhe do ta presim aktgjykimin. Nëse ka drejtësi këtu, besoj se do të ketë rezultat shumë të mirë për Z. Thaçi në fund të krejt kësaj”, ka thënë Luka Misetiq, Avokat i Hashim Thaçit.
Mbrojtësi i Thaçit është pyetur edhe për qasjen e presidentit amerikan Donald Trump, i cili ka kundërshtuar punën e ish-Kryeprokurorit të Prokurorisë së Specializuar në Hagë, Jack Smith.
Por, Misetiq është shprehur i rezervuar.
“Nuk jam në një pozicion të di se çfarë do të bëjë administrata Trump. Detyra ime këtu është që të punoj brenda katër mureve të kësaj Gjykate dhe ta kryej punën time deri sa të më thonë që nuk duhet ta bëj më këtë punë. Kështu që brenda katër mureve të kësaj Gjykate, siç thashë ne besojmë se gjatë procesit është qartësuar dështimi i Prokurorisë për të vërtetuar pretendimet kundër Z. Thaçi”, ka thënë Luka Misetiq, Avokat i Hashim Thaçit.
Të gjithë dëshmitarët e Prokurorisë kanë përfunduar dëshmitë e tyre, kurse tani e kanë radhën ata të Hashim Thaçit, Jakuk Krasniqit, Kadri Veselit dhe Rexhep Selimit.
