www.telegrami.mk
SKANDAL NË TETOVË: Bilall Kasami pranon publikisht – “Nuk mbledhim borxhet se humbim vota!”
Tetova po përballet me një deklaratë që trondit logjikën e funksionimit të një komune. Kryetari Bilall Kasami, në vend që të ofrojë zgjidhje për krizën me ujin, pranon hapur se Komuna nuk i mbledh faturat sepse ka frikë nga reagimi i votuesve.
Pra, me fjalë të thjeshta: ligji ndalet aty ku fillon frika nga zgjedhjet.
Në vend të zbatimit të rregullave, Kasami propozon një “zgjidhje të shpejtë” – dorëzimin e sistemit te një kompani private (PPP). Por a është kjo reformë, apo një mënyrë për të larë duart nga përgjegjësia dhe për t’ia kaluar faturën qytetarëve?
Shifrat janë katastrofike:
- 10 milionë metra kub ujë humbin në sistem
- vetëm 3 milionë faturohen
- nga ato, inkasohen maksimumi 60%
Kjo do të thotë se pjesa më e madhe e ujit zhduket, ndërsa Komuna pranon pafuqinë – ose mungesën e vullnetit – për ta kontrolluar situatën.
Ndërkohë, qytetarët përballen me mungesa të shpeshta të ujit, rrjet të amortizuar dhe zero përgjegjësi konkrete.
Deklarata e Kasamit nuk është thjesht gafë politike. Është pranim i hapur se pushteti lokal po funksionon me logjikë elektorale: “mos i prek votuesit, edhe nëse sistemi po shkatërrohet”.
Dhe tani, zgjidhja? Një kompani private që do të bëjë atë që Komuna nuk guxon – të mbledhë borxhet. Me një dallim të madh: këtë herë, faturën mund ta paguajnë më shtrenjtë vetë qytetarët.
Nga kampanja zgjedhore e 2021 dhe 2025 “kam çelës për çdo problem”, te “s’bëjmë dot as faturimin pa humbur vota” në 2026– ky është realiteti i ri në Tetovë.
Pyetja që mbetet është e thjeshtë:
A po zgjidhet problemi, apo thjesht po zhvendoset – bashkë me përgjegjësinë?
www.telegrami.mk
Mesut Shabani
