Gazetarja dhe analistja bullgare e proceseve në rajon, Nina Spasova, pret rritje të tensioneve në Maqedoni dhe protesta kundër pushtetit në vend, sidomos në sfondin e tragjedisë në diskotekën e Koçanit.
“Populli do drejtësi, do të presë një javë zie para se të ketë demonstrata më serioze, protesta. Supozoj se do të ketë përshkallëzim, tensioni do të rritet. A do të ketë njerëz të dënuar (nga pushteti)? Nuk besoj”, ka komentuar Spasova për bTV.
Sipas saj, problemi në vend është i akumuluar dhe është shumë herë më i madh se ai në Bullgari.
“Ne jemi ende një shtet evropian, nuk është fare njësoj. Rezulton se vetëm disa nga diskotekat atje kanë licencë”, theksoi Spasova.
Sipas saj, as diskotekat e licencuara nuk i plotësonin të gjitha kushtet, ndërsa në Bullgari, për shembull, kërkesat për mbrojtjen nga zjarri janë mjaft të larta.
Spasova beson se është e mundur që protestat në Maqedoni të zgjerohen në kërkesë për ndryshim të sistemit politik, sepse shumica e njerëzve në vend dëshirojnë hyrjen në BE.
“Unë jam pak skeptik se ata do të ndikojnë në qeveri. Ata thonë: “Ne duam të jemi në Evropë, Bullgaria po na pengon”. Ata po kërkojnë arsye për të mos qenë në Evropë”, tha Spasova.
linku
