Dëgjoj Mickoskin si thotë “diktim bullgar”, çfarë diktimi bullgar kur propozimi është franko-gjerman. Këtu kombi maqedonas fiton automatikisht legjitimitet ndërkombëtar, Bundestagu votoi për njohjen e gjuhës, kulturës, kombit maqedonas, ka një iniciativë në Kongresin amerikan, Senatin amerikan për të nderuar kulturën, gjuhën, historinë e Maqedonisë, të mos humbasim shansin sepse historikisht kombet dhe shtetet janë ndërtuar me aleancë, miqësi, do të mbetemi vetëm, të izoluar, do të humbasim shansin për anëtarësim në BE dhe pastaj do të luftojmë mes vete se kush është tradhtari, le të kërkojmë tradhtarët, theksoi kryetari i BDI-së, Ali Ahmeti, duke komentuar deklaratat e liderit të opozitës VMRO-DPMNE, Hristian Mickoski.
Ahmeti tha dje në emisionin “360 gradë” në RTMV 1 se kur i përfshin bullgarët si kategori kushtetuese, automatikisht “bënindarje, maqedonasit dhe pakicën bullgare”. Sipas kreut të BDI-së, Uashingtoni, Brukseli dhe NATO-ja kanë punuar intensivisht për katër vjet për të ndryshuar Kushtetutën dhe për ta bërë pakicën bullgare një kategori kushtetuese.
“Ju merrni legjitimitet ndërkombëtar, gjuhën, traditën, kulturën – dhe ky është një moment historik, ne jemi të gjithë bashkë për këtë zgjidhje dhe po të mos isha i bindur, nuk do t’ju kisha bërë thirrje juve, gjithë opozitës, momenti i duhur, kyç është sot, nesër do të jetë vonë dhe nesër do të hyjmë në konflikt se kush ishte tradhtari, a ishte Mickoski, Zoran Zaev apo Kovaçevski. Kjo përplasje do të ndodhë nesër, sepse shanset vijnë një herë dhe ky është momenti i duhur, legjitimiteti ndërkombëtar i kombit maqedonas, gjuhës maqedonase, historisë maqedonase. Çfarë fituam nga pala greke për moszgjidhjen e problemit në momentin e duhur? Degraduam, sepse oferta fillimisht ishte më e përparuar se zgjidhja që bëmë. Ndryshimi i emrit vetëm për përdorim të jashtëm, por jo për përdorim të brendshëm, tha kreu i BDI-së.
Në vërejtjen e një gazetari se maqedonasit mund të thonë se Ahmeti e ka të lehtë të flasë për ndryshime kushtetuese dhe marrëdhënie me Bullgarinë sepse nuk cenohet identiteti i shqiptarëve, ai thekson se bashkëqytetarët maqedonas nuk duhet të mendojnë se “ne po punojmë pas shpine sepse ky vend është edhe i yni, ne duam të ndërtojmë të ardhmen këtu sepse kemi lindur këtu”.
“Në këtë situatë, unë si përfaqësues i shqiptarëve po flas sepse e di se si mendojnë shqiptarët dhe ju i keni në krah për të zgjidhur përfundimisht çështjen e identitetit të kontestuar nga një fqinj. Nuk është e lehtë të kundërshtosh dhe të krijosh problem për fqinjin, sepse e keqja vjen gjithmonë nga fqinji, jo nga larg. Jemi angazhuar pa bujë, pa zhurmë, por gjithmonë me angazhim të drejtpërdrejtë për të arritur një zgjidhje të drejtë, por pa rrezikuar identitetin e bashkëqytetarëve tanë maqedonas”, thotë lideri i BDI-së.
Historikisht, siç tha Ahmeti, dy kombet kishin shumë gjëra që i lidhnin, por edhe gjëra që i dallonin, të cilat më së shumti ishin rezultat i gabimeve politike, e jo gabimeve të popullit shqiptar dhe maqedonas.
“Nuk është fajtor populli maqedonas që ekzekutohet Nexhat Agolli sepse ka kërkuar drejtësi në vitin 1949, sepse është pjesëmarrës në mbledhjen e ASNOMIT, dhe kidnapohet , arrestohet dhe e eliminon UDBA-ja e atëhershme. Këtu populli maqedonas nuk është fajtor, sepse populli maqedonas së bashku me shqiptarët me flamu shqiptar kanë luftuar në brigadat partizane”, theksoi Ahmeti.
