Marketingu i drejtpërdrejtë i kompanive në Kosovë, qoftë për t’i njoftuar qytetarët për produkte-shërbime të reja apo edhe për zbritjet e ndryshme, pa marrë pëlqimin e tyre paraprakisht, përbën shkelje të privatësisë.
Në lidhje me këto njoftime ka më së shpeshti ankesa në Agjencinë për Informim dhe Privatësi (AIP), sipas Komisioneres së AIP-së, Krenare Sogojeva-Dermaku.
“Nuk mund të dërgosh SMS të qytetari pa e pasur paraprakisht pëlqimin se a dëshiron të njoftohet për të rejat, për produktet e reja apo për zbritjet që mund të jenë dhe përveç se duhet ta kenë pëlqimin paraprak më shkrim, duhet ta kenë mundësinë e fshirjes, nëse nuk duan të pranojnë SMS të tillë më”- është shprehur Sogojeva-Dermaku në “KallxoPernime”.Lidhur me këto shkelje, Sogojeva-Dermaku thotë se janë shqiptuar edhe gjoba, ndërsa pavarësisht kësaj prapë vazhdon të ketë raste të tilla, edhe pse kompanitë kanë filluar të ndërgjegjësohen në këtë aspekt, thotë ajo.
