Analisti Edward Joseph nga Shkolla e Studimeve të Avancuara dhe Ndërkombëtare të Universitetit Johns Hopkins në Uashington tha në një intervistë për Deutsche Welle se nisma e Ballkanit të Hapur ka “implikime të rrezikshme” që nuk kuptohen mirë.
- Rreziqet e një Ballkani të Hapur nuk kuptohen mirë, megjithëse janë të qarta për shumë vetë në Ballkan. Kam punuar për më shumë se një duzinë vjet – duke përfshirë edhe vitet e luftës – në të gjitha vendet e prekura nga konfliktet në Ballkan. Si shumë në rajon, edhe unë shoh dinamikë në atë prizëm, veçanërisht pohimin e nacionalizmit serbomadh, të cilin sot e promovon presidenti Aleksandar Vuçiq dhe delegatët e tij nën flamurin e “Botës Serbe”, thotë Jozefi.
Më tej ai në intervistë shton:
- Nisma e Ballkanit të Hapur nuk është vetëm një shpërqendrim nga problemet thelbësore në rajon – të cilat janë politike – por në fakt rrezikon t’i përkeqësojë ato probleme politike.
Problemet me Ballkanin e Hapur mund t’i përmbledhim si më poshtë: “teori e dyshimtë; ndërtim naiv; implikime të rrezikshme”.
Le të fillojmë me teorinë e nënkuptuar pas “Ballkanit të Hapur”: “tregtia është e barabartë me besimin” (ky është përshkrimi im). Fatkeqësisht, kjo teori rrëzohet në realitet. Vetëm shikoni agresionin e shfrenuar rus kundër Ukrainës. Deri më 24 shkurt, Rusia dhe Ukraina kishin një tregti të madhe, me vlerë pothuajse 10 miliardë dollarë në vlerë të kombinuar eksport-import. Kina aktualisht po kryen stërvitje ushtarake agresive kundër Tajvanit, një vend që eksporton mallra me vlerë 273 miliardë dollarë në Kinë, përfshirë gjysmëpërçuesit kritikë. Kina është partneri tregtar numër një i Tajvanit, duke zënë një të tretën e tregtisë së saj.
Sipas teorisë së Ballkanit të Hapur, të gjitha këto vende duhet të jenë në paqe. Përkundrazi, ata janë ose në luftë, ose në prag lufte. Mbështetësit e Ballkanit të Hapur duhet të kërkohet ta shpjegojnë këtë, thotë ai.
Intervistën e plotë mund ta lexoni në Deutsche Welle.
