Lëshimet në procedurë për rastin “Transmet” nuk janë te avokati i shtetit, por në prokurori, thotë për TV24, Avokati i Shtetit i shkarkuar, Fehmi Stafa. Ai sqaron se ka ndërmarrë të gjitha hapat e nevojshme, por PSP-ja e atëhershme e ka përjashtuar nga procedura.
“Pse prokurori gjatë procedurës penale nuk ka kërkuar përfshirjen e Avokatit të Shtetit, ashtu si 2 marrëveshjet e fundit, si me Sasho Mijallkovin dhe Orce Kamçevin, me Prokurorinë për Krim të Organizuar dhe Korrupsion në krye me Villma Ruskoska? Me konfiskim, përveç pronës, kaloi edhe i gjithë borxhi me të cilin ishte ngarkuar pasuria dhe ishte detyrë ligjore e prokurorit që të kërkonte që të deklaroheshin të gjitha ato hipoteka dhe borxhe me të cilat ishte e ngarkuar pasuria”, thotë ish-avokati i shtetit, Fehmi Stafa.
Në një rast të tillë nuk kisha çfarë të bëja, më kishin lidhur duart, shpjegon Stafa.
“Varet se në cilën fazë të procedurës penale, prokurori është i vetmi që i ka të gjitha provat. Në rastin konkret, si mund të pranohet si garanci për heqjen e masës së paraburgimit të tashmë të dënuarit Sead Koçan, pronë që përfshihet në vendimin për caktimin e masës së përkohshme që ai vetë ka kërkuar të ngrihet? Pse nuk u alarmua dhe u apelua kundër një vendimi të tillë”, pyet Staffa.
Me aktgjykim të formës së prerë, thotë Stafa, pasuria e konfiskuar nuk është kompetencë e Prokurorisë së Shtetit. Vetëm Agjencia për Pasurinë e Konfiskuar disponon me atë pronë. Stafa thotë se Prokuroria e Shtetit, me ligj, nuk është përfaqësuese e Agjencisë për Pasurinë e Konfiskuar.
Avokati i shtetit me kërkesën e tij u shkarkua pak ditë më parë me arsye zyrtare për arsye personale. Sot ai sqaron se shkarkimi i tij në fakt është për shkak të keqkuptimeve me institucionet tjera kompetente.
Shkarkimi i Stafës vjen në kohën kur ish-kryetarja e Prokurorisë për Krim të Organizuar dhe Korrupsion, Villma Ruskoska, si dhe kreu i Policisë Financiare, Arafat Muaremi, janë suspenduar nga puna. Njohësit besojnë se tërheqja e Stafa-s ka lidhje të drejtpërdrejtë me pezullimin e Ruskovskës dhe disa tema kyçe për të cilat kanë punuar dy institucionet.https://24.mk/details/fekhmi-stafa-odgovornosta-ne-e-vo-drzhavnoto-pravobranitelstvo-tuku-vo-obvinitelstvoto
