Me 339 vota pro, 249 kundër dhe 24 abstenime, eurodeputetët mbështetën raportin përfundimtar për rishikimin e ligjeve të emetimeve të dioksidit të karbonit (CO2). Ligji është një pjesë kyçe e paketës evropiane të klimës “Gati për 55” dhe kërkon që prodhuesit e automjeteve të reduktojnë plotësisht emetimet deri në vitin 2035, duke ndërmarrë hapa të përkohshëm në 2025 dhe 2030. Versioni përfundimtar ligjor tani do të duhet të hartohet gjatë bisedimeve me këshillin. Ministrat e mjedisit do të nënshkruajnë versionin e tyre të ligjit në samitin e Luksemburgut më 28 qershor.
Partia Popullore Evropiane mbrojti një amendament alternativ, i cili vendosi një objektiv për të reduktuar emetimet deri në 90 për qind deri në vitin 2035, por pa një datë të qartë për ndalimin e motorëve me lëndë djegëse fosile. Ky propozim u refuzua dhe u pranua varianti “më i rreptë”. Ndër të tjera, sepse Partia e Gjelbër e kundërshtoi me forcë këtë propozim “më të butë”.
Industria e automobilave luan një rol jetik në ekonominë evropiane dhe përbën 7% të prodhimit të brendshëm bruto të Bashkimit, duke punësuar 14.6 milionë njerëz. Nga ana tjetër, trafiku është i vetmi sektor ku emetimet e gazeve serrë po rriten – në vitin 2017, makinat e pasagjerëve përbënin 21% të emetimeve totale të dioksidit të karbonit brenda BE-së. R.E.L
