Shtetet e Bashkuara të Amerikës po shqyrtojnë dërgimin e avionëve në Poloni nëse Varshava vendos të dërgojë avionë luftarakë në Ukrainë, tha sot Sekretari amerikan i Shtetit Anthony Blinken gjatë një vizite në Moldavi.
“Tani jemi duke shqyrtuar në mënyrë aktive çështjen e avionëve që Polonia mund t’i dorëzojë Ukrainës dhe ne mund të shohim se si mund t’i kompensojmë ata nëse Polonia vendos t’i dorëzojë ato avionë,” tha Blinken.
“Nuk mund të flas për afate, por mund të them vetëm se po e shqyrtojmë në mënyrë shumë aktive”, shtoi ai.
Disa media amerikane kanë raportuar për një marrëveshje të mundshme midis Shteteve të Bashkuara dhe Polonisë për dërgimin e avionëve luftarakë polakë të epokës sovjetike në Ukrainë në këmbim të avionëve luftarakë amerikanë F-16 për Varshavën.
“Ne po punojmë me polakët për këtë çështje dhe po konsultohemi me aleatët e tjerë të NATO-s”, citohet të ketë thënë një zëdhënës i Shtëpisë së Bardhë nga Wall Street Journal dhe NBC.
Vizita e Blinken në Moldavi vjen pasi ai vizitoi dje Poloninë anëtare të NATO-s, në një kohë kur Aleanca po forcon krahun e saj lindor në përgjigje të pushtimit rus të Ukrainës.
