Kancelari gjerman Olaf Scholz i drejtoi sot një fjalim urgjent parlamentit gjerman për pushtimin rus të Ukrainës. Scholz u tha ligjvënësve se Gjermania do të ndajë 100 miliardë euro në një fond special për ushtrinë, duke rritur shpenzimet e mbrojtjes në më shumë se 2 për qind të PBB-së.
“Është e qartë se ne duhet të investojmë më shumë në sigurinë e vendit për të mbrojtur lirinë dhe demokracinë tonë”, tha Scholz.
Kjo është një lëvizje e rëndësishme për Gjermaninë, e cila prej kohësh është kritikuar nga Shtetet e Bashkuara dhe NATO për mos investimin e duhur në buxhetin e mbrojtjes.
Fjalimi i Scholz shënon një pikë kthese të madhe në politikën gjermane të mbrojtjes dhe sigurisë në përgjigje të pushtimit rus të Ukrainës.
Dje, qeveria gjermane njoftoi se do të dërgonte armë direkt në Ukrainë, e cila po lufton për të zmbrapsur pushtimin rus.
