Vëmendjen në takimin mes presidentëve Emmanuel Macron të Francës dhe Vladimir Putin të Rusisë në fillim të kësaj jave, pos temës kryesore të diskutimit të gjatë prej disa orësh, e mori edhe tavolina gjigante, që i mbajti udhëheqësit disa metra larg njëri-tjetrit. Për tavolinën e madhe u spekulua shumë. Disa thanë se, përmes saj, presidenti rus ka dashur të përçojë mesazh diplomatik. Megjithatë, dy burime i thanë agjencisë “Reuters” se presidenti francez e ka refuzuar testin rus për Covid-19, prandaj autoritetet kanë vendosur që dy udhëheqësit të qëndrojnë në distancë.
Sidoqoftë, vetëm tri ditë pas takimit të së hënës me homologun francez, Putini e priti në Moskë Presidentin e Kazakistanit, Kassym-Jomart Tokayev. Ndryshe nga takimi me presidentin e vendit evropian, me të cilin nuk arriti ndonjë marrëveshje për Ukrainën të hënën, Putini u pa shumë më afër homologut kazak.
Në këtë takim nuk u pa tavolina e famshme. Në vend të saj, mes dy presidentëve po qëndronte një tavolinë shumë më e vogël, që dukej më e ngushtë se 1 metër, ndërsa Putini dhe Tokayevi ishin shumë më afër njëri-tjetrit. Madje, ata edhe u fotografuan duke i shtrënguar duart.
Nuk dihet nëse presidenti kazak ka pranuar që ta bëjë testin rus PCR për koronavirus, por distanca e vogël fizike e tij me Putinin lë të kuptohet se ai u është nënshtruar rregullave të protokollit të vendit pritës.
Autoritetet ruse kanë vendosur kushte të rrepta për njerëzit që dëshirojnë të takohen me Putinin, përfshirë izolimin për dy javë.
