Shkupianët do të mbeten pa ngrohje qendrore këtë fundjavë? BEG thotë se nuk ka para për furnizim me gaz dhe kërkon që shteti të marrë përkohësisht prodhimin.
- Likuiditeti i PTBE-së është varfëruar me shpejtësi dhe ka fonde për furnizim me gaz deri në fund të ditës së nesërme. Si kompani me përgjegjësi sociale, informojmë se nuk kemi më shumë burime për financimin e sezonit të ngrohjes pa ndihmë shtetërore për kompensimin e tarifës për prodhimin e ngrohjes, kështu që nuk do të mund të vazhdojmë me prodhimin e ngrohjes. Për të siguruar prodhimin e pandërprerë të energjisë termike në PTBE, i propozuam Qeverisë që të marrë menaxhimin e përkohshëm të kompanisë duke filluar nga data 14.01.2022 deri në përfundimin e situatës së krizës në këtë sezon të ngrohjes, thuhet nga kompania.
Lidhur me gjashtë milionët e ofruara nga Qeveria për mbulimin e kostove të larta të furnizimit me gaz, BEG ka sqaruar për Sitelin se këto para janë për muajin shkurt, por kompanisë i duhen që të mund ta kalojë janarin.
Problemet në funksionimin e furnizuesve të ngrohjes erdhën për shkak të çmimit të gazit i cili u rrit tre herë.
Ndryshe, sot Qeveria ka marrë vendim që TE-TO të punojë gjatë fundjavave për të ndihmuar në furnizimin me ngrohje dhe rrymë. Ndonëse Qeveria theksoi se çmimi me të cilin Te-To do t’ia shesë rrymën ESM-së nuk duhet të kalojë 170 euro, nga kompania sqaruan se nuk mund ta shesin energjinë elektrike për një çmim nën çmimin e prodhimit që aktualisht është 251 euro.
Pas situatës së re në sektorin e energjisë, nga Ministria e Ekonomisë thanë për Sitelin se nesër do ta komentojnë kërkesën e BEG-së dhe reagimin nga TE-TO.
