Bashkimi Demokratik për Integrim dënon hipokrizinë e Izet Mexhitit, i cili sot nga Kuvendi ka tentuar të shmangë përgjegjësinë për nënshtrimin e tij ndaj VMRO-DPMNE-së dhe miratimin e narrativave monoetnike në sistemin arsimor.
E vërteta është se këshilltari në Veles, i cili votoi për himnin, është pikërisht njeriu i Izet Mexhitit, i cili ishte pjesë e BDI-së për shkak të tij dhe më pas u largua bashkë me të. Ky fakt nuk mund të mohohet, pavarësisht tentativave për manipulim dhe hedhje të fajit diku tjetër.
Edhe më qesharake është paaftësia e Mexhitit për të shqiptuar fjalën himni, të cilën ai e quan “himri”. Si mund të mbrojë ai shqiptarët nga poshtërimi, kur nuk arrin as të artikulojë fjalët e duhura?
Izet Mexhiti dhe grupi i tij treguan sot edhe një herë se janë të paralizuar nga urdhrat e patronëve të tyre të VMRO-së dhe nuk kanë guxim të mbrojnë interesat e shqiptarëve. Nënshtrimi dhe paaftësia e tyre janë të qarta për të gjithë.
Bashkimi Demokratik për Integrim do të mbetet zëri i shqiptarëve dhe mbrojtësi i dinjitetit të tyre në çdo institucion.
