Kryetari i Komunës së Tetovës, Bilall Kasami, ka njoftuar sot se shuma e faturave për shërbime komunale nuk do të rritet, edhe pse nga 1 janari 2024 do të fillojë ekonomizimi i mbeturinave përmes partneritetit publik-privat.
Ai ka shpjeguar se ka një organ rregullator që vendos për çmimet dhe do të ketë vetëm ndryshim në pjesën e përllogaritjes, pra në vend që për një kokë banori, tash e tutje do të jetë për metër katror.
“Metodologjia e mëparshme për kokë banori nuk ishte e drejtë për qytetarët sepse për shumë familje, kryesisht ato më të varfrat, paguanin më shumë, kurse ata që kanë më shumë hapësirë, pra më shumë hapësirë banimi dhe afariste, paguanin më pak. Tani me metodën e re për metër katror do të bëhet një vlerësim i llogaritur i faturave të mbeturinave, vlerësojmë se do të jetë më e drejtë për qytetarët, pra nuk do të ketë ndryshim, por vetëm ndryshim metodologjie”, tha Kasami.
Për një furnizim më të mirë me ujë të pijshëm, komuna ka përgatitur një studim fizibiliteti, tha Kasami, duke sqaruar se nga ai studim janë nxjerrë disa konkluzione. Ai thekson se duhet investuar në ndryshimin e gazsjellësit të rrënuar.
Sa i përket pastërtisë publike, ai tha se tashmë që koncesionari privat do të punojë për grumbullimin e mbetjeve, ndërmarrja komunale do t’i përkushtohet ndërgjegjësimit të qytetarëve në fushën e pastërtisë publike, si dhe mirëmbajtjes së hapësirave publike të parqeve dhe gjelbërimit.
