Instituti për Politika Publike Arbën Xhaferi ka parashtruar fletëparaqitje ndaj Prokurorisë Publike të Republikës së Maqedonisë së Veriut për shkelje të Ligjit për përdorimin e gjuhëve, duke kërkuar mbikëqyrje dhe gjobitje nga Inspektorati për Përdorimin e Gjuhëve.
Më 26 qërshor 2023, IPP Arbën Xhaferi ka dorëzuar dy kërkesa në gjuhën shqipe për qasje në informata me karakter publik përmes postës elektronike zyrtare të Prokurorisë Publike dhe postës elektronike të zyrtarit përgjegjës. Më 29 qërshor 2023, IPP Arbën Xhaferi ka pranuar përgjigje përmes postës elektronike se kërkesat duhet të paraqiten në gjuhën maqedonase në mënyrë që të njejtat të marrin përgjigje.
Më 30 qërshor, IPP Arbën Xhaferi ka nisur ankesë zyrtarë pranë Prokurorisë Publike, duke vënë në pah se refuziumi për t’u përgjigjur në gjuhën shqipe është shkelje flagrante e Ligjit për përdorimin e gjuhëve (Gazeta Zyrtare Nr. 7/2019) dhe e Ligjit për aksesin e lirë në informacionin publik (Gazeta Zyrtare Nr. 101/2019). IPP Arbën Xhaferi i ka kujtuar Prokurorisë Publike që e drejta për të paraqitur kërkesa dhe marrë përgjigje në gjuhën shqipe, si një nga dy gjuhët zyrtare në Republikën e Maqedonisë së Veriut, garantohet nga Ligji për përdorimin e gjuhëve dhe se shkelja e kësaj të drejte do të detyrojë IPP Arbën Xhaferi të parashtrojë iniciativë te Inspektorati për Përdorimin e Gjuhëve për mbikëqyrje sipas nenit 20 dhe 22 të Ligjit për përdorimin e gjuhëve dhe Nenit 26 të Ligjit për Inspektoratin për Përdorimin e Gjuhëve (Gazeta Zyrtare Nr. 220/19 dhe 42/20).
Meqenëse Prokuroria Publika ka injoruar shkresën e datës 30 qërshor, duke bërë shkelje të dyfishtë të afatave të parapara me Ligjin për qasje të lirë në informata me karakter publik dhe të Ligjit për përdorimin e gjuhëve, IPP Arbën Xhaferi ka dorëzuar ankesë pranë Agjencisë për mbrojtjen e të drejtës për qasje të lirë në informacione me karakter publik si dhe fletëparaqitje pranë Inspektorati për Përdorimin e Gjuhëve.
IPP Arbën Xhaferi i bën thirrje Inspektoratit për Përdorimin e Gjuhëve të zbatojë obligimin e tij për mbikëqyrje të institucionit që shkel Ligjin për përdorimin e gjuhëve, përfshirë përmes gjobitjes së paraparë me nenin 22.
Neni 22 i Ligjit për përdorimin e gjuhëve parasheh gjobë në shumë prej 4.000 deri në 5.000 euro për institucionin që shkel dispozitat e ligji si dhe gjobë prej 30% të gjobës së përcaktuar për personin zyrtar përgjegjës për shkeljen.
