Zëvendëskryeministri i parë i Qeverisë dhe zyrtar i lartë partiak i Bashkimit Demokratik për Integrim (BDI) – Artan Grubi ka deklaruar se lideri i VMRO-DPMNE-së, Hristijan Mickoski, “tashmë është pajtuar që në 100 ditët e fundit të mandatit të kësaj Qeverie, ajo të drejtohet nga një kryeministër shqiptar”.
“Marrëveshja mes BDI-së dhe LSDM-së është që 100 ditë para zgjedhjeve të kemi kryeministër shqiptar. Kjo është diskutuar midis Zoran Zaevit dhe Ali Ahmetit. Është interesant fakti se edhe Zaevi parashikoi se në 100 ditët e fundit të qeverisë, ajo do të udhëhiqet nga një kryeministër shqiptar, me këtë, besoj, pajtohet edhe Dimitar Kovaçevski. Tani, më lejoni të them se edhe VMRO-DPMNE është dakord të ketë një kryeministër shqiptar. Është biseduar mes BDI-së dhe VMRO-DPMNE-së. Bëhet fjalë për 100 ditët e fundit të kësaj Qeverie. Ahmeti dhe Mickoski kanë biseduar personalisht për këtë”, tha Grubi.
Sipas tij, Mickoski nuk ka asgjë kundër shqiptarëve e as kundër kryeministrit shqiptar dhe si konfirmim tha se në vitin 2020 kur po negociohej marrja e qeverisë nga VMRO DPMNE, në BDI i ka ardhur ky propozim:
“Lidership aktual i VMRO DPMNE-së i ofroi BDI-së që kryeministri shqiptar shqiptarë të jetë dy vjet, e pas dy vjet të jetë maqedonas. Pra në vitin 2020 keni pasur ofertë nga Mickoski për kryeministër me rotacion”, ka theksuar Grubi.
