Nga përmbajtja e deklaratave të paraqitura në padi, absolutisht nuk mund të konkludohet se i padituri ka pasur për qëllim të nënçmojë dikë, të paktën në rastin e paditësve, njëri prej të cilëve është person fizik dhe tjetri është shoqatë nga Kanadaja, deklaroi avokati Ljupço Iliev, mbrojtës i ministrit të Punëve të Jashtme Bujar Osmani, i akuzuar për fyerje dhe shpifje ndaj Lëvizjes Ndërkombëtare Maqedonase për të Drejtat e Njeriut.
Sipas tij, pretendimet dhe provat e propozuara nga paditësit “absolutisht nuk mund të ndërlidhen dhe të futen nën dispozitat e Ligjit për përgjegjësinë civile për fyerje dhe shpifje”.
“Gjykata mbetet të vlerësojë pretendimet nga ana jonë”, tha ai në një deklaratë për mediat pas seancës së sotme përgatitore.
Në pyetjen se pse, sipas tyre, nuk bëhet fjalë për fyerje dhe shpifje, ai u përgjigj se nga ana e ministrit, tani të paditur, është shprehur vetëm opinioni publik për aktivitetet e shoqatës. “Ai ka shprehur vetëm një kritikë publike për sjelljen e shoqatës”, tha ai.
Avokati i paditësit, Trajçe Torov, nga ana tjetër, deklaroi se “nuk guxon që një zyrtar – pushtetar që ka pushtet, të ofendojë financuesit e aktivistëve të të drejtave të njeriut”.
“Financimi i Shoqatës së minoritetit maqedonas nga Bullgaria të trajtohet si një gjë e dyshimtë dhe si një element antishtetëror, para së gjithash, siç e shpjegova atje, synon edhe ata financues dhe ato shoqata. Shoqatat akuzohen se kanë fajin e tyre ose viktimat e shkeljeve të të drejtave të njeriut kanë faj për situatën e tyre, sepse pranojnë ndihmë nga kushdo. I pandehuri është ai që duhet të ndihmojë dhe ka për detyrë të ndihmojë viktimat e shkeljeve të të drejtave të njeriut, e jo të vendoset në anën tjetër duke fyer ndihmësit e atyre viktimave”, tha ai.
Sipas tij, “i dyshuar” është një term që përdoret për dikë që është më pak i vlefshëm, i cili duhet të hetohet.
Torov informoi se është paraqitur kërkesë monetare në vlerë prej rreth 10 mijë euro në kundërvlerë në denarë.
Në lidhje me pyetjen e kërkesës së përmendur për dorëheqje nga ministri i Punëve të Jashtme, ai u përgjigj se ishte indirekte.
Në Gjykatën Themelore Civile të Shkupit, sot filloi gjykimi pas padive të parashtruara më 27 janar 2023 kundër ministrit të Punëve të Jashtme Bujar Osmani nga kryetari i Lëvizjes Ndërkombëtare Maqedonase për të Drejtat e Njeriut (LNMDNJ) Bill Nikolov dhe LNMDNJ si organizatë.
Bëhet fjalë për padi sipas Ligjit për përgjegjësi civile për fyerje dhe shpifje.
Në seancën e sotme avokati i paditësit, Trajçe Torov, i ka paraqitur provat që janë pjesë e padisë dhe i është përgjigjur disa ankesave lidhur me padinë.
Sipas avokatit të të pandehurit, Ljupço Iliev, i cili ka propozuar që padia të refuzohet si e pabazë, nga përmbajtja e padisë nuk mund të pranohet se i pandehuri është fajtor për atë që akuzohet.
Procesin e udhëheqë gjyqëtarja Jehona Sadiku. Gjykimi vazhdon më 29 maj.
