Sot jehoi informacioni se ish-drejtori i Drejtorisë doganore, Dragan Daravelski, është arrestuar në vendkalimin kufitar Tabanovc, pas 20 vitesh në arrati. Edhe pse Daravelski do ta kalojë natën pas hekurave, sepse tashmë është dërguar në burgun e Idrizovës, ka shumë gjasa që nga nesër të jetë qytetar i lirë, për shkak të parashkrimit të ekzekutimit të dënimit.
Konkretisht, Daravelski u dënua me shtatë vjet burg në mungesë në vitin 2007 për shpërdorim të pozitës dhe pushtetit zyrtar dhe kërkohej me urdhër ndërkombëtar. Sipas aktgjykimit, ai e ka dëmtuar buxhetin e shtetit për 2.5 milionë euro në periudhën 1999-2002. Sipas Kodit Penal, nga kryerja e krimit kanë kaluar 20 vjet, dhe nga hyrja në fuqi e dënimit kanë kaluar më shumë se 10 vjet, që automatikisht do të thotë se Daravelski nuk do ta vuajë dënimin me burg, sepse ai ka skaduar.
