Rreth 65.96 % e qytetarëve parizienë votuan pro në një referendum.Banorët e Parisit së fundmi kanë votuar në një referendum për të kthyer në pedonale 500 rrugë të tjera të qytetit, si një hap për të frenuar përdorimin e makinave dhe për të përmirësuar cilësinë e ajrit.
Rreth 65.96% e banorëve të Parisit votuan pro, ndërsa 34.04% e kundërshtuan atë, sipas të dhënave nga rezultatet zyrtare. Ky ishte referendumi i tretë i tillë në Paris, pas një votimi të vitit 2023 që miratoi ndalimin e skuterëve dhe një vendimi vitin e kaluar për të trefishuar tarifat e parkimit.
Projekti do të eliminojë 10,000 vende të tjera parkimi në Paris. Banorët e qytetit do të konsultohen se cilat rrugë do të bëhen zona për këmbësorët dhe kopshtet.
“Rruga afër shtëpisë time tashmë është gjysmë këmbësore, dhe ka shumë, shumë pak makina që kalojnë. Unë i kam ndjerë vërtet përfitimet, sepse ka shumë pak zhurmë në rrugë. Është shumë e qetë, mund të ndjeni se ka shumë njerëz që ecin”, tha Matthew Findley, menaxher i një kompanie biçikletash elektrike.
Votuesit që ishin kundër propozimit thanë se ai vetëm do të përkeqësonte trafikun e makinave pasi shumë rrugë do të mbylleshin.
“Mendoj se kjo është një masë qe nuk është menduar mirë. Pasojat nuk vlerësohen asnjëherë, as për sa i shqetëson njerëzit, as për kostot. Duke pasur parasysh paaftësinë absolute të ekipit, rezultati mund të jetë i keq sepse ata nuk dinë të krijojnë e as të mirëmbajnë hapësira të gjelbra. Mendoj se do të ishte më mirë të mirëmbahen kopshtet ekzistuese dhe të lihen rrugët për qëllimin e tyre”, tha Anne Brassens, avokate.
Pavarësisht ndryshimeve të fundit, Parisi mbetet pas kryeqyteteve të tjera evropiane për sa i përket infrastrukturës së gjelbër, të cilat përfshijnë kopshte private, parqe, rrugë me pemë etj., që përbëjnë vetëm 26 % të zonës së qytetit kundrejt një mesatareje të kryeqyteteve evropiane prej 41%, sipas Agjencisë Evropiane të Mjedisit.
Kryebashkiakja e Parisit Anne-Hidalgo, në detyrë që nga viti 2014, ka mbikëqyrur një transformim të rëndësishëm në rrugët e qytetit. Që nga viti 2020, janë krijuar 84 km korsi biçikletash dhe përdorimi i tyre u rrit me 71% midis fundit të bllokimeve për COVID-19 dhe 2023-it.
Në lagjen e 18-të në Parisin verior, banorët që votuan për masën shprehen se rrugët vetëm për këmbësorët ishin shumë më të këndshme për shkak se ka me pak zhurmë dhe se ishte e rëndësishme të rriteshin hapësirat e gjelbra në qytet për të përballuar temperaturat më të nxehta.
“Parisi është një qytet i pasur me minerale, kështu që nxehet shumë shpejt në verë. Rritja e bimëve ndihmon në përballimin e temperaturave të larta”, tha Boris Hodonou, banor.
“Kur jeni duke bërë ndryshime dhe duke marrë drejtime të reja, ka një shqetësim që nuk mund të mohohet. Gjithashtu do të thotë që ne duhet të detyrojmë veten të rimendojmë zakonet tona. Sot, në Paris , është më e lehtë të lëvizësh duke përdorur mënyra më të lehta transporti, qoftë me biçikletë apo njerëz që duan transport publik”, tha Gerald Briant, oficer.
Dyqind rrugë janë tashmë të pedonalizuara rreth Parisit, ku 118 prej tyre kanë shkolla. Mbi trotuaret e betonit janë vendosur bimë dhe lule. Parizienët mbi 16 vjecc kishin të drejtën e votës për të votuar në referendum.
Klan News
.
