Diplomon Luani, djali i Shkëlzen Haradinajt

32

Në mesin e kadetëve të diplomuar të Forcës së Sigurisë së Kosovës, e cila u mbajt sot ishte edhe djali i vëllait të liderit të Aleancës për Ardhmërinë e Kosovës, Ramush Haradinaj, Luani, për të cilin familja u ndje shumë krenar.

Të pranishëm në këtë ceremoni, ishin nëna e tij Suzana si dhe ish-kryeministri i Kosovës, Ramush Haradinaj, i cili tha se ceremonia e sotme ishte e denjë për një ushtri pjesëmarrëse në NATO.

Ai i uroi gjeneratën e diplomuar të kadetëve dhe tha se janë jashtëzakonisht të gëzuar për këtë arritje.

“Gjithçka që ishte sot i takon një ushtrie moderne, tamam një ushtrie të NATO-s e gjithë ceremonia. Gjeneratës 2020 shumë urime. Kuptohet sot jemi edhe si familjarë së bashku me Suzanën, sepse diplomoi Luani. Jemi jashtëzakonisht të gëzuar”, tha Haradinaj.

Ndërkaq, tashmë kadeti i diplomuar i FSK-së, Luan Haradinaj tha se tash është me detyra të reja, dhe plot emocion u shpreh se është krenar.

“Shumë i emocionuar, shumë krenar. Tash jemi në detyra të reja”, tha Luan Haradinaj pas diplomimit.

Gjatë ditës së sotme, diplomuan 15 kadetë të FSK-së, ndër të cilët ishte edhe një e re nga Republika e Shqipërisë, Lirëza Dollomaja e cila mori çmimin për kadet të dalluar.