Kryeministri shqiptar, Edi Rama reagoi ndaj deklaratës së presidentit të Republikës së Maqedonisë së Veriut, Stevo Pendarovski në të cilën ai thotë se veçimi i Maqedonisë së Veriut nga paketa me Shqipërinë, nuk është gjë e mirë, por është mënyra e vetme e mundshme për të marrë dritë jeshile për fillimin e negociatave me BE-në.
Rama këtë qëndrim të presidentit Pendarovski e vlerëson si habitës, duke përkujtuar siç thotë në kontributin kyç të Shqipërisë dhe shqiptarëve në proceset demokratike tek vendi fqinj. Sipas tij, kjo kërkesë nga Pendarovski, nuk është as e drejtë e as praktike. “Presidenti Pendarovksi nënkupton favorizimin e ndarjes nga Shqipëria në vendimin për negociatat? Çudi kjo qasje, sidomos kur konsideron kontributin kyç të Shqipërisë dhe shqiptarëve në zhvillimet demokratike dhe rrugën evropiane të shtetit mik. S’duket as e drejtë as praktike faktikisht!”, shkruan Rama.
Deklaratën e presidentit të Maqedonisë e komentoi edhe ish-shefi i diplomacisë shqiptare, Ditmir Bushati, sipas të cilit veçimi i Maqedonisë nga Shqipëria do të ishte gabim strategjik për BE-në. “Sipas KE-së edhe Shqipëria edhe Maqedonia e Veriut i përfunduan detyrat e shtëpisë. Në kushte të tilla veçimi i tyre do të ishte gabim strategjik për BE-në. Nevoja për fillimin e negociatave përkon me kërkesat e shoqërive të të dyja vendeve, të historisë dhe rajonit”, shkroi Bushati në Tuiter.
Pendarovski deklaratën e ka dhënë për Euroaktiv gjatë vizitës në Bruksel, me ç’rast ka shtuar se problemi më i madh është se si të zbatohet ndarja. “Në Shqipëri tani është kaos. Opozita i braktisi institucionet. Çfarë të themi? Ne kishim rekomandim pozitiv nga Komisioni edhe paraprakisht, ndërsa edhe më herët kemi qenë të veçuar nga Shqipëria”, deklaroi Pendarovski për Euroaktiv të enjten.
